2010年10月23日星期六

10-23(sat) 讀心神探

終於有d時間睇番已經播到一半o既“讀心神探”…睇咗頭幾集…又幾好睇喎! d人話佢係抄外國戲, 我完全相信有其事, 不過抄都有抄得好睇同唔好睇之分…咁呢套我就咁睇都覺得幾ok! (雖然我身邊d人意見好唔一致, 有一jar覺得好好睇, 有一jar又鬧爆…不過是但啦, 好唔好睇呢d嘢一向好主觀…我就覺得ok)! 頭幾集講咩“記憶宮殿”, 仲有d心理學研究o既小動作+反應…都幾得意呀! 有幾真我就唔知, 但佢成日講o個句“見微知著”, 我一向都覺得好o岩! 每個單元d故事亦都幾ok呀, d演員都做得唔錯! 尤其呢期幾鍾意阿田…

其實當年佢o係亞視我已經ok buy佢…94年佢唱亞視世界盃主題曲咩“熱燙的宇宙”已經覺得呢個“o靚妹”(其實係姐姐啦)幾過癮! 之後最buy佢其實係99年“縱橫四海”做明智傑個老婆…呢套佢做得幾好, 同埋靚咗好多…仲好似有唱插曲添?!

跟住去到無綫, 戲路又好似變咗d…我諗佢真人應該係幾大顛大肺, 轉數快, 寸寸貢o個d (呢樣o係超級巨聲已經睇到啦!)…亦係我最buy的元素…但佢o係d戲度做溫婉嫻淑又做得好神似喎…舊年“宮心計”我o地已經讚過啦…仲有“蔡諤與小鳯仙”都好似係呢d俾人hup到好慘的角色, 但又出奇地神似喎…真係掂! 仲有佢做“超級巨聲2”主持又真係ok稱職喎, 口才同急才都得…仲要反應快!

佢o係“超級巨聲2畢業演唱會”終於有得唱番自己當年參加比賽首參賽歌“一首獨唱的歌”…雖然我覺得佢以前唱得好d, 但依家無唱咁耐都算係咁o既…至少好過黑暗小公主好多! 同埋點解會有咁多人唔知佢係唱歌出身o架? 亞視”未來偶像爭霸戰冠軍”嘛…搞到佢太肉緊要show俾大家知佢唱得, 令到有d位走走o地…否則真係幾唔錯吓…


(超級巨聲2畢業演唱會…田蕊妮+吳筠怡+梁皓婷 - 一首獨唱的歌)

Oh, 講開大塊田, 忍唔住要click埋去睇番”縱橫四海”主題曲”烽火情天”mv…



又…講開“超級巨聲2”…呢期因為幾buy胡鴻鈞, 走去睇番佢比賽d片段…佢唱呢首”西關大少”主題曲真係幾得喎…我記得當日都有睇呢集, 都記得有個參賽者唱完呢首歌我都覺得幾好聽, 但無留意到原來係佢…係到依家睇番先知! 某程度上我覺得唱得好過chilam添 (chilam fans唔好打我...我都好鍾意chilam…但對於呢首歌我真係咁覺得嘛, 可能我buy佢以呢個腔口去演繹呢首歌啦...:p)...搞到我翻聽咗不下數十次!


(胡鴻鈞 - 相愛無夢)

仲有慧敏哥o既“歲月的童話”, 雖然佢o既唱功有待改進, 但演繹呢首歌個mood又真係值得一讚, 好聽過羅嘉良版好多, 真係唱出o個個感覺…令我忽然覺得首歌好好聽…當年睇“流金歲月”都無覺得咁好聽!


(陳慧敏 - 歲月的童話)