8-30(wed) 棟篤神探

hohoho, 上個禮拜五深夜12點幾開始, 無線重播04年最高收視劇集“棟篤神探”…呢套劇真係幾鬼好笑o下, 當年都好鍾意睇! 黃子華同蔡少芬都做得好好, 仲有魏駿傑都好出囉!

無線今次都係一個good move, 終於播完佢d什麼又唔叫好又唔叫座o既“翡翠首映”… o岩o岩播完o既“倩女幽魂”, 之前o既 “心慌心郁逐個捉”, 同埋再之前o既“追魂交易”…全部都幾唔掂o下! 好就係可以慳番d時間早d[目訓]囉…但係對無線o黎講, 簡真係傻仔啦!



明明自舊年o係o個個時段重播 “創世紀”掀起深夜時段追舊劇熱潮之後 , 無線o係o個個時段重播o左一連串超正o既舊劇…好似尋秦記, “刑事偵緝檔案”系列, 仲有“難兄難弟” 等…o個時又話會播埋“陀槍師姐”系列o既…欺騙我, 真係失望喇! 點知之後就無啦啦o係o個個時段就整個咩“翡翠首映”, 播晒d陳年倉底貨…係就係可以銷到d舊貨, 但係你之前都唔敢播, 即係覺得d劇唔掂啦, 你咁樣o係呢段12點幾o既extended-黃金時間播番晒, 咪流失晒之前重播舊劇時辛苦儲番o黎o既觀眾…個決策人今次實在太失策喇!

今次播“楝篤神探”, 應該都可以where番d流失o左o既觀眾o卦?! 記得兩年前首播時, 真係日日d同事都o係度講呢套劇…什麼“唔洗騰, no problem!”/ “若要人不知, 唔好太低b”…全部都成為大家o既口頭禪!



李慧慧同莫探員真係笑爆咀! 李慧慧呢個咁癲o既角色, 簡直係蔡少芬o既一大突破, 佢做得好誇張, 但出o黎o既效果又真係唔錯喎! 黃子華就當然唔洗講啦…最大驚喜o既反而係魏駿傑, 佢個李慧慧o係保險公司o既死對頭角色, 真係幾出位! 仲有第一集就帶住成team人o係度rap口號o個part都好好笑! 又係保險…o岩o岩“愛情全保”先講完保險…不過兩套劇o既style都唔同o既!



o係阿魏駿傑隊team入面, 其中兩個居然係李氏孖仔 (李泳漢+李泳豪)…佢兩個廿年前係最紅o既童星, 當年合演“勢不低頭”, 仲有“絕代雙驕”o既小魚兒+花無缺, 風頭一時無兩…見到佢o地依家淪落到做大大大茄喱啡, 真係可悲! 同埋以前好精靈o既李永豪, 依家個樣真係好唔掂, 仲有係好矮囉!



至於依家瘦到成條柴o既韓君婷, o個時未厭食o既佢好樣好多, 飽滿好多…依家真係好恐怖, 真係唔慌唔“瘦出美麗人生”囉!



oh, 依家又要追番三線劇, 實在好忙碌啊!