2006年8月14日星期一

8-14(mon) 2006香港小姐

話咁快今屆港姐又選完, 幾乎唔知佢做o左添! 禮拜六o個晚約o左d朋友出街食飯, 佢o地好驚訝點解港姐決賽日都可以約到我?! 其實要特登推晒所有約會留o係屋企睇港姐o既日子已經不再o左好耐…前幾年都會期待睇呢個大show o既 (但絕對唔會為此而唔出街), 今年直頭係前幾日睇d宣傳片先知道禮拜六決賽, d佳麗邊個打邊個都唔多分得清…可見港姐選舉對我o既影響力已經近乎零…同一般大show無咩分別!

十幾年前的確係會因為睇港姐而特登唔出街…但當年o既港姐決賽真係一年一度o既大大大show, 大家都會好緊張…依家邊個選o左出o黎都幾乎無人知!

其實呢個 “港姐情意結”, 亦都係俾我d表姐影響…話說好細個o既時候 (大約4,5歲)…第一次有印象坐o係度睇o既應該係1984年高麗虹o個屆…事關當時逢禮拜六一眾表兄弟姐妹就會齊集o係婆婆屋企…我幾歲時, 有d表姐已經十幾歲, 正值熱切地睇電視o既年紀…所以受佢o地影響之下, 我比一般同年紀o既小朋友早十年就開始追“香港小姐”呀, “勁歌金曲”呀, “新秀”等節目…亦都係因為我d親愛o既表姐, 造就o左今日o既“電視精”芒姐!

記得o個時同d表姐一齊坐o係電視機前睇港姐, 佢o地仲好認真咁叫我一齊俾分…基本上當時得4歲幾o既我, 連d姐姐仔o係度做咩都唔多清楚, 更遑論去評論邊個靚d, 邊個身材好d! 但就係咁樣跟d表姐坐o係度俾分俾o左幾年, 就養成o左我呢個每年定時定候坐o係度睇港姐o既習慣…過o左幾年, 佢o地大個o左唔再坐o係度同我一齊睇港姐, 我依然會自己每年好緊張咁推晒所有約會坐o係電視機前俾分, 睇o下自己tip得中唔中…有時仲會逼埋阿爸阿媽阿爺一齊俾分 (不過通常佢o地都好敷衍我)…到宣佈三甲時, 個心仔仲會跟住一齊不停咁跳…不過我呢份熱情, o係好多年前已經減退o左! 呢幾年, 只係當一貫大show咁循例睇o下!

其實我覺得佢由唔知上年定前年開始, 一take過準決賽加埋決賽同一日搞都算係明智之舉, 反正依家已經無咩人睇呢個節目, 再唔同十幾年前係收視o既保證, 閒閒o地都有三四十點…慳番d資源, 都係一件好事!

同埋我覺得佢由以前o既禮拜日搬o左去禮拜六做都幾好, 起碼錄起o左深夜可以睇番晒!



講番今屆港姐個show, 最好睇我覺得係一開場o個part, 個結婚場面幾grand, 仲要由阿爸拖出o黎, 真係搞到好似個婚禮咁…幾得意, 幾感動! 除此之外, 成個show都悶到爆! 最唔掂係個什麼問答環節…叫d佳麗介紹一本書/一套電影 (仲要真係得書/電影兩樣o野咁大把)…嘩! 悶到呀!個show已經無咩人睇o架啦, 仲搞埋d咁悶o既環節…更唔掂係有三個佳麗都介紹joy luck club…你事先係咪應該叫d佳麗com o下先? oh, 救命呀….實在太唔掂! 之後再整個什麼“誰是首輪被淘汰佳麗”d咁無聊又殘忍又令人難堪o既環節…真係好失策!

最鍾意都係狄娜姐姐無啦啦出o黎o翕幾句o野…佢真係字字珠璣, 好啜核! 邊個話身材勁o既人係無腦o架?! 連曾志偉d咁有急才o既人都俾佢搞到亂晒章…阿叻呢d自以為好叻但其實從來都唔多掂o既, 就更加啞口無言啦, 淨係識得胡亂地擦鞋, 仲要係擦得好核突o個隻! 最鍾意狄娜姐姐話阿志偉讚佢唔係真心, 好抵死…真係好鬼死鍾意d人咁寸! 志偉話有睇過佢套“七擒七縱七色狼”…其實我都有, 仲要唔止一次…因為深夜成日都有重播! 不過以依家o既尺度o黎講, 真係唔算係咩一回事!

至於d佳麗, 其實今屆o既質素都唔算太差o既…但唔明點解d妝要化到咁濃囉…有d死人化妝feel! 個什麼大熱門黃瑩好醜樣, 同埋唔知點解個感覺有d cheap…可能因為睇得多雜誌封面登佢以前做model d相…好彩佢五甲不入! 仲有一個係勁醜樣o既, 好似係七號…不過唔記得o左佢叫咩名! 另外有一個叫李穎芝o既個樣有d似關心妍, 仲要成日擺出一副以為自己好靚o既樣, 真係好唔掂!

反而俾喻為“女版李準基” (其實我唔知李準基係邊個/咩樣, 好似係一個韓國男星) o個個曾瑞珊…係就係男仔頭d, 但幾爽朗, 個樣都唔差…我比較buy呢隻! 個“黑珍珠婷婷”鄭詠森都ok…仲有一號曾愛媚高頭大馬, 都幾有格, 同埋個款有d似廖碧兒, 不過廖碧兒就sweet好多!

而整體個賽果都好合理…冠軍陳茵媺幾大方得體, 幾有冠軍格…個樣都好過上屆個葉翠翠好多! 亞軍+最上鏡小姐周家蔚就真係唔多靚, 賽前亦都無咩聽過佢係邊個…不過個感覺都幾pleasant, 每年都總有個咁o既佳麗爆出o既! 至於季軍個“翻版舒淇”呂慧儀都算ok!

最唔掂係個形象負面到爆燈o既徐淑敏…個家姐! 佢o係最尾五強環節上台o翕o野, 感覺已經唔多大方, 以為自己個妹掂硬…跟住到開信封揭曉冠軍, 佢一見自己o個張係白紙, 即係佢個妹唔得時, 即刻黑面同埋力bear隔離, 睇o下人o地o個信封有無o野…仲要忍唔住流露o左一副不屑o既嘴臉…真係有其姐必有其妹, 兩個o既感覺都無咩教養…一個人o既家庭背景, 真係影響好深遠! 齋得個樣, 真係唔撐得幾耐!

仲有, o係上屆冠軍葉翠翠小姐卸任時又再睇一次佢個樣…真係要再講多次, 葉小姐真係無論個樣定談吐都好唔得…由舊年當選到依家個感覺都依然唔掂…依家佢終於卸任, 真係好!

芒姐的香港小姐系列:


2005港姐謝師宴



2004香港小姐



2003給香港小姐



1994年度香港小姐選舉



1993年香港小姐