2005年12月13日星期二

12-13(tues) 王維德+戴夢夢

尋日講開王維德, 唔記得講一樣關於佢o既冷知識…其實我都係知道o左無幾耐咋!

(芒姐冷知識又來了: 原來王維德個家姐係王敏明…真係十個晴天pig pig! 即係以前做舞蹈藝員, 跳過張國榮隻“Monica” o個個呢…之後轉o左去做藝員, 我最記得佢o係“蓋世豪俠”裡?做鍾意吳鎮宇o個個, 俾段玉樓呃o左之後, d毒傳o左俾佢, 跟住佢就一夜白髮, 仲著住件紅衫…好恐怖! 同埋原來佢仲係當年無線曾經力捧o既『銀河七星』之一添! 當年仲有套叫 『神劍魔刀』o既電視劇, 係特登開俾佢o地“銀河七星”做…以全新人去擔呢套戲…好勁! 但我其實聽都未聽過呢套戲…唔好講話睇呀!)

另一樣冷知識, 係前日講過戴夢夢首“全靠你教我渣車”… 原來隻歌叫 “雨裡同行”…第二段係 “如落雨我會擔遮 不怕痛快一些”…好頂?! 點解隻歌唔叫“雨裡擔遮”呀?! 另一發現係: 呢首歌又係高皓正填詞, 即當年o既“中大謝霆鋒” (今日“東張西望”仲有佢訪問真o既謝霆鋒添!)… “學警雄心”主題曲好似又係佢填詞, 仲有份同他學警一齊唱埋添! (跟住原來另一個學警, 又係有份唱主題曲但懷疑係佢唱到走晒音o個個郭力行有首新歌, 又係佢填詞, 叫 “笨過人”…原來佢係一個多產填詞人! 但我唔明…點解郭力行可以做歌星? 隻歌仲好似係佢自己作曲o既添!)

阿夢夢首“雨裡同行”真係一首好騎呢o既歌…但我鍾意! 最衰以前學車未有呢隻歌…如果唔係一邊聽住一邊[手查]都幾爽…事關我相信駕駛學院d車應該都會keep住播呢首歌! 同埋不心而論, 呢隻歌旋律都幾好聽, d歌詞都好易上口…不過, 睇完成份歌詞…我覺得…我都可以去填o下詞…哈哈哈哈哈哈!!!

雨裡同行 - 戴夢夢

作曲:吳國恩
填詞:高皓正
編曲/監製:吳國恩

全靠你教我渣車 使我壯闊一些
能有勇氣駕駛 不必驚入夜
泥濘路處處 無懼暴風雨
別怕它 學了車 越過崎嶇的荒野

我信會有康莊大道
有心 始終都去得到
垂頭別喪氣 難行別生氣
放心 來日有轉機
*如落雨我會擔遮 不怕痛快一些
能夠雨?唱歌 都應該道謝
沿途就算凍 前頭是彩虹
若有始 便有終 全程( 打風都) 驍勇*

有鬥志會差天共地
怕輸 天都不會幫你
憑無盡勇氣 能無懼天氣
來吧 前面了不起

Repeat *
曾坐過三輪車
來到這天 路很斜
仍舊會振作上路 元氣 滿瀉
Repeat *

那怕收遮 風勢再猛一些
還會雨過天青 不必驚入夜
泥濘路處處 無懼暴風雨
別怕它 自信些 越過漆黑的荒野
Repeat *

Image hosted by Photobucket.com

(少少題外話: 細個o個時幾鍾意比我更細o既戴夢夢…因為佢o係“Q表姐”?面真係做得幾好, 同埋個樣好得意! 當年睇“Q表姐”, 反而最鍾意係睇佢! 到幾年前又見佢出番o黎, 但已經變o左個少女去參加新秀…仲話係翁虹契女嘛! 依家d細路真係大得快! 佢又係好似黃美棋, 細個把聲好沙, 大個唔知點解又變o左d嬌聲! 本來寫o左半篇“Q表姐”review, 但寫到一半無寫到…好懶惰!)

Image hosted by Photobucket.com

仲有一單新聞想講好耐:“LV店重開日冇份去Party 趙靜儀500件珍藏賤賣洩憤”…實在係太好笑o既一段新聞…趙小姐本身個人已經好騎呢, 最深刻係佢成日查唇膏都查出界, 仲有係唔明佢點可以o係質素最高o既89年亞姐選舉當中, hum贏伍詠薇奪得季軍…匪夷所思! 不過都戥佢高興…咁都搏到一日頭條!

今日世貿會議終於揭幕, 好多日o黎政府都懶緊張咁…呢幾日地鐵都多o左好多食蕉, 本來唔係好緊張, 都搞到好緊張咁!

今日睇新聞見d示威者“暴動”…我覺得似做show多過示威, 又跳海, 又搞parade…而警方明知佢o地會做d激進行為又做足準備, 跟本大家似做show多d! 我都唔明第一批警察點會無頭盔戴o架? 你都明知d人癲o架嘛, 又唔係突發事情o黎o既, 咁你都唔準備好, 做你d警察都好危險喎! 反而無線d記者都有頭盔帶, 鄺美鳳好似就快俾人打咁款! 而d示威者又係o既, 都預o左警方會用胡椒噴霧…你好心就戴定眼罩啦!