2005年11月5日星期六

11-5(sat) “賤男梁榮忠偷食斷正車震足本睇”

呢段新聞鬧得全城熱烘烘, 經獎門人推介, 即刻走上快週刊個網址睇o左呢個“賤男梁榮忠偷食斷正車震足本睇” 片段, 但係要比較少人上網o既時段先可以睇到! 個片段成9分幾鐘, 我一邊睇住第二d o野一邊睇, 都覺得好悶囉! 車就唔知震唔震喇, 但個記者隻手就真係好震! 同埋全程黑孖孖, 基本上我咩都睇唔到…係後尾好似見到兩個人咀, 但唔肯定係咪佢o地…但如果唔係佢o地, 本雜誌又唔咁夠膽擺呢個片段上網屈佢o地o既! (不過其實睇到最尾o個兩分鐘, 我都幾肯定o個個係梁榮忠, 至於係咪朱慧敏…我覺得都應該係! 同埋依家已經no dispute, 因為佢兩個自己都認o左喇!)

無可否認, 佢兩個o既形象真係大大受損…報紙話朱慧敏因為港姐形象受損, 被抽起所有工作 (仲要係做o左第一日“娛樂直播”就俾人飛起)…本來都覺得佢幾慘o既, 好多藝人都搞埋d咁o野o架啦, 不過睇完呢段片, 發覺佢兩個都唔抵幫, 都係cheap o個隻o架喇! 朱慧敏選港姐時都已經係唔簡單o個隻, 牙尖咀利好犀利…估唔到佢仲會搭上佢口中o既“師傅”囉…咁樣好核突! 最核突係佢扮無知話唔知梁榮忠有女友?!

梁榮忠本來呢期人氣急升, 又殘酷一叮, 仲有深夜o既“刑偵”(係咪好押韻先?! 話我“娘”囉!)…“義仔”o既形象又健康又討好! 呢期我都幾buy佢o架…點知佢呢單“賤男”新聞搞到咁樣衰…最樣衰係佢上個禮拜仲死撐唔認, 又懶理直氣壯咁話得“鍾小姐”一個係真, 又話俾人屈, 又話好高興可以o係年尾食番個尾糊做到封面, 多謝晒本雜誌咁話…又話同其他o個三個女仔唔熟, 又話唔通同人食o下飯就係有o野咩…其實你明知自己係有做o既, 仲俾人影到相…就算唔認都唔好咁多辯駁, 仲講到人o地屈佢咁, 我係本雜誌都唔gur啦, 仲唔爆你大鑊? 真係好核突! 跟住依家證據確鑿, 佢先走o黎默認, 仲走埋成龍o個d“犯o左所有男人都會犯o既錯”路線, 話最緊要同個女友交代, 又扮晒好男人…真係好?膽!

朱慧敏上個禮拜就話同梁榮忠唔係好熟, 佢只係好似師傅咁教佢好多o野, 又話只係食過幾餐飯, 又話佢o地唔會有發展機會, 因為人o地有女友blah blah blah…跟住今個禮拜再出o左個封面之後, 就無啦啦又話無o野回應, 又唔否認, 咁即係擺明身有屎啦…跟住依家仲改口話當初唔知人o地有女友添…又係愈講愈核突…好心上個禮拜就唔好咁理直氣壯啦!

同埋好心作為公眾人物, 你偷情就偷得醒d啦, 邊有人o係車上偷情o架…慌死人唔知咩?! 你咁做即係擺明落個女友面, 難得佢女友又既往不咎…不過無辦法啦, 佢依家要靠梁榮忠養!

相關新聞:
好男人”慘變“經典賤男” 梁榮忠車廂偷吃

車震後朱慧敏維護梁榮忠

有個問題, 咁究竟當年鍾麗淇係咪都係梁榮忠同傅明憲o既第三者呢?! 呢d係咪報應呢? 不過好明顯, 傅明憲同梁榮忠分手係塞翁失馬…如果唔係佢依家點可以咁嘆, 同埋點可以有咁多多餘錢同隻狗搞喪禮呀?! 如果佢當年係俾梁榮忠飛…其實應該恭喜佢!

哎! 等我呢期仲力追緊 “刑偵1&2” (因為錄o左好多“刑偵1”都仲未睇完, 但有時又會睇播緊o既“刑偵2”…仲覺得義仔真係幾唔錯, 又正義又情深又帶點鬼馬…點知佢依家就搞到咁核突! 哎! 掃晒地喇…我講佢o既形象呀!

鍾麗淇, 其實我一開始都唔多buy佢…睇“刑偵3”時, 佢個角色又煩, 形象又不太討好…到8年後o既依家, 對佢o既感覺係neutral啦, 仍然唔係特別討好…不過“刑偵3”o係我心目中依然係唔多好睇o既, 我勸大家睇完“刑偵2”可以bye bye喇…因為全套“刑偵3”有40集, 但著o左30集都係阿“車匙”o係度大聲疾呼佢咩都唔記得…仲有其他新角色都唔多討好, 無o左“容金枝”蘇玉華, 換成個“思龍”鍾麗淇, 仲有陳法蓉, 同埋d人話佢好戲 (至少可以教人做戲) 但我就覺得佢極度浮誇o既羅冠蘭…所以呢一輯簡直可以話係全套“刑偵”o既敗筆! 如果唔係“刑偵2”臨尾加o左10集, 就唔會夾硬整呢個“失憶”橋段…更加唔會焗住搞到成套“刑偵3”都維繞住個失憶情節! 雖然我當初好鍾意睇“刑偵2”時, 都好高興聽到佢會添食10集…但係如果結果將套劇搞成咁, 我寧願佢無加到呢10集! 真係“一子錯滿門皆落索”!

最後, 我覺得無線cut o左佢o地個“娛樂七日鮮”節目真係明智之舉, 因為佢d藝人形象實在太差, 尤其o個幾個主持…費事以後集集都係訪問番自己d藝員啦!