9-23(fri) 酒店風雲大結局

好高興“酒店風雲”終於大結局…我完全唔知我呢個禮拜黐o左邊條筋, 日日o係度睇呢套咁“精彩”o既戲! 不過套戲確係有可取之處o既, 起碼好笑…d劇情可笑得很…所以睇得我好開心!

繼“局中局中局中局”同埋“報復報復再反報復”之後, 尋日我終於知道呢套戲背後o既藍本原來係“三隻小豬”的故事…實在係晴天pig pig o左!

同埋永遠都唔知邊句係真話邊句係大話…確係有d煩…臨尾仲要再次教訓大家唔好講大話, 否則無好報…簡直係教育電視…成套戲又要懶多twist咁, 我一邊睇一邊驚最尾呀劉丹會翻生囉!

反而最欣賞o既都係o係結尾時克勤隻“一生不變”再度出擊…不過今次唔係由呀曹永廉唱“一幽風飛散髮披肩”, 而係呀吳唱k無啦啦o係條橋度高唱“休休戚戚循環不斷”…我真係寧願聽呀曹永廉唱喇! 其實呢part都唔多make sense, 呢隻明明係人o地曹永廉向官恩娜示愛o既歌, 阿情敵吳唱k又點會用番呢首歌o黎挽留ella呢? 仲要又唔係唱得好聽過人喎! 但最最最弊o既係o係佢未開腔之前, 本來係播緊克勤唱o既版本…佢一開口…實在太被比下去喇! 本來呢隻歌o係克勤o既舊歌song list?面, 絕對唔係我o既“飛化核”…我喜愛o既係“月半小夜曲”& “大會堂演奏廳”, 甚至係“命運符號”…但係今次聽完佢o地唱o既version之後, 唔知點解又覺得克勤呢隻歌幾好聽!

搵到一個有曹永廉出過o既碟+唱過o既歌o既website…果然係有“長夜動人燦爛”同埋“情深款款”, 仲有一隻有印象o既叫“糊塗情感”! (oh btw, 我唔記得原來佢o既前女友係鄺文珣喎…有棵咁o既樹咩?)

今日錄o左少少“金裝季節”o黎睇…完全唔知同“季節”有咩分別? 定係其實係同一套戲, 只不過剪o左d精彩片段出o黎就叫“金裝”? 但係之前明明已經播晒成套“季節”o架嘛…點會又播過? 有無人可以話我知?

依家睇“娛樂直播”, 忽然覺得徐子珊已經做得幾好…可能係因為對比起一班新出爐港姐! 而o係呢堆新人之中, 反而落選o既袁彌明同麥雅緻做得最自然…可能好似93年郭可盈o個屆咁, 特登揀晒d完全唔掂o既去?獎 (i.e. 莫可欣, 林麗薇同淑梅姐個friend余少寶), 留番d比較得o既o係度, 仲即刻開套“catwalk俏佳人”俾佢o地拍…由落選o既郭可盈, 陳妙瑛同麥家琪擔戲, 再加the rest of the落選佳麗主演…得獎o個幾個反而只可以客串幾場戲…學利智話齋: 係有陰謀o架!

仲有, 呢兩日有郭可盈訪問…都幾好睇! 尤其呢期有佢o既兩線劇集齊齊播…應該輪到佢人氣急升喇!



oh…today’s special…“再睇星期五”有“靚佬湯”訪問呀…sorry, 唔係大家諗o個個, 而係湯鎮業呀!!!!!!!!!!!!!!!!!!!!!!!!!!!!!!!!!! 嘩!!!!!!!!!!!!!!!!!!!!!!!!!!!!!! 亦都唔好誤會, 我絕對唔係佢fans, 亦都唔係話我認為依家o既佢靚仔 (不過係fit過佢之前o個個肥佬look好多o既…畢竟佢都曾經係“五虎”中最“靚”<之前o係“八十年代的美麗傳說-TVB當家花旦之翁美玲” o個篇已經解釋過何謂“靚”, 唔o係度再講多次喇!>…只係覺得n年無睇過佢o既電視訪問, 同埋佢o地五虎真係曾經經典過…!

仲要係由當年同佢傳緋聞o既吳君如訪問佢…幾有趣…好期待! 當年仲被傳到係因為吳君如呢個第三者介入而令翁美玲自殺身亡…咁大o既包袱, 真係唔係人人都背得起…害死o左當時o既萬人迷喎…佢係咩新鮮蘿白皮呀?! 當時佢兩個係俾人鬧到揪筋…至於之後點解吳君如翻到身而湯鎮業搞成咁…真係連我都唔知! 要問番d大多幾年o既朋友先得…我相信我o地個年紀o既朋友仔, 應該無咩印象!

呢個訪問仲有講好多關於五虎o既舊事…所有五虎fans或者八十年代fans都一定要睇啦! 我睇完再向大家報告!