8-22(mon) 生日禮物

襯住牛一, 破禁公開一張多年珍藏…其實係咁o岩執o野摷到o既! 之前同d朋友仔講開年少時寫信俾“明星”或者寫信去香港電視o既事跡…其實之前o係呢度都披露過少少, 最經典莫過於寫信俾陳妙瑛…當年都唔敢話俾人聽, 淨係俾過我表姐睇…依家睇番當然無所謂啦, 更加唔介意俾人知…因為我覺得幾鬼好笑添!

年少時o既我係走d成熟路線, 寫信俾明星係唔多配合我o既人物性格o架嘛…但十年後o既今日睇番呢d珍藏, 都真係好好笑, 好抵死…差d唔記得我都有瘋狂過o架, baby!

o黎喇…大家可以瞪大雙眼睇清楚我o既珍藏喇…一份10年前o既特別生日禮物…



除o左簽名相, 仲有親筆回o既信添…係咪勁先?! 可能因為我係佢頭幾個fans, 所以有咁o既待遇! 事關佢當時都唔係話好紅 (而大家亦應該會記得我講過話最鍾意“鋤強扶弱”, d歌星明星一多人鍾意, 我又無咁鍾意喇…好似當年o既sammi同千嬅咁…事關佢o地都無咁需要我支持啦!), 應該係o岩o岩播緊“婚姻物語”, 我好鍾意睇呢套戲, 亦好欣賞陳妙瑛o架! 當年o既佢作為新人, 真係演得好好! 哈哈! 估唔到我曾經係陳妙瑛fans呢?! 今次真係你估我唔到!

我覺得呢張相+信應該比起張玉珊cd更有份量, 更應該可以憑相換取LF產品…同我另一位偶像邵美琪一齊分享囉!



(除o左陳妙瑛, 我記得我仲好似寫過一封英文信俾李綺虹, 寄過幾封信去香港電視o既讀者信箱…包括投訴佢因為播“梅花三弄”而腰斬我好鍾意睇o既“開心華之里”; 仲有o係睇完1995年新秀之後, 即刻寫信去問佢究竟楊千嬅同鄭秀文係咪有咩關係, 點解會似樣似成咁…仲叫佢o地介紹o下楊千嬅o既資料…哈哈!　真係好騎呢！)